1 Corinthians 7

Vaikala sou Taula'i

1Ioxe vaimomo 'o eni akolinu vaivaikala ane ngingi ngekau-kavunu. Lexe itema utaula'i uasi ne anu laixe. 2Ia tava'u aloxo 'ilixo sou vote'i muxali mu'oki, la sou laixe sou ta mulu vilevilesi ne itaula'ixa'a ta semai'a uisalilisi. Xe ta sema vilevilesi ne kalumo itaulaixa'a ta mului'a uisa'ilisi. 3Mo sou mulue umomosou u'oxo 'ilixo sou taula'i ne ulai noxie semau xe semau i'oxo aloxo ne kalumo ulai noxou mulue. 4Mo semau vasimele ne anesisi naesi uasi, ia mulue nau kalumo. Iouvilesisi aloxo ne, mulue vasimolu ne anusisi nausi uasi ia semau na'e kalumo. 5Io mamu sou nga'apisou vasimenge ngato'o noxinge la. Ia laixe lexe ngingi ngongou nga'oxonu aloxo ne no voxo se'i mo sou opo se'isisi sou ngingi ngasaxila'inge va'axu sou lakilakasi xe ukalu la ngane'e ngapita la mo sou Satani utovongengi xo loxo ngingi ngamomomo sou ngasaxila'inge la uasi ne mamu. 6Vaikala ane eni elemolu 'o ne anu loxo vaikala manina sou ngamulinu uasi. Vaikala ane 'o sou usaxila'ingesi. 7Eni amasaxa lexe ta mitema ukalusi ne ixolu si aloxo eni ataula'i uasi. Ia uasi xo ta mitema vilevilesi ne Lataua mualusi'a iouiou. Vile na'u aloxo 'o xe vile na'u aloxo 'olele.

8Ano 'o eni avikala ulai noxi'a ta samula mo ta vaalu aloxo 'o. Anu laixe sou lexe ane'i ixolu samulaxa'a aloxo eni 'osi. 9 ^aIa lexe ane'i me'a imomomo sou isaxila'a uasi, la ane'i itaula'isi mo laixe, xo loxo 'o io tane'i ialuxu sou taula'ixa'a. 10 ^bEni a'italonu vaikala pekia'u ano 'o ulai noxi'a ane'i ane mitautaula'i, eni avikala uasi anu Tila muvikala lexe mamu sou sema i'umesou mulue io ixolu va'axu. 11Ia lexe ane i'oxonu aloxo ne, la ane ixolusi io itaula'i la uasi xe uasi la ane ilivu sou itaula'ixu mulue la. Xe mamu sou mulu ukusaie semau ixexee. 12Eni avikala ulai noxinge ngingi ane leviani ne aloxo, eni avikala ia Tila uasi. Lexe vivinge vile u'uluxe semau ne imulaxu tane uasi ia imasaxa lexe ixolu noxousi la anu umomomo sou ukusaie ixexee mamu. 13Mo lexe sema vile iuluxu mulue vile ne umulaxu tanu uasi, ia anu umasaxa lexe uxolu noxiesi ne la ane imomomo sou ikusau uxexee mamu. 14Xo sema mulue ane ulavusou umulaxu tanu uasi ne muxali va'axu loxo Lataua na'u ne a noxie semau nesi, xe mulu semau ane ilavusou imulaxu tane uasi ne, mixali va'axu loxo Lataua na'u ne a noxou mulue nesi. Lexe aloxo ne uasi, la ta 'ili'a ne ixali nunii'a, ia anu aloxo ne la sou ane'i ne mixali loxo Lataua ta na'u. 15 ^cIa lexe ane'i ane imulaxu tane'i uasi ia imasaxa lexe i'ume ixexee la ngamalalixa'a i'oxonu aloxo ne. Mulu mo sema ane mimulaxu tane'i ne mii vile usakine'i uasi, Lataua mu'avalinge ne sou taxolu no anu opo se'isisi. 16 ^dXo nini semau, nelavu a loxovaa, lexe nini nemomomo sou napamaulinu mulumeni uasi? Xe nini mulue nelavu a loxovaa, lexe nini nemomomo sou napamauline semameni uasi? Nexi talavusou uasi.

Utetelisou Mauli Iou Aloxo Lataua Mulosou no Mine Anu Mu'avalou

17Anu aloxo ne la sou itema vilevilesi ne anu utetelisou mauli iou aloxo Lataua mulosou no mine anu mu'avalou. Vaikala ane ne eni alosinge ulai no anu lalolalotu noxinge ukalusi. 18Loxovaa itema vile xooxoo mungasou tei mukalu ia Lataua mu'avalou? La mamu sou anu uxexeenu xooxoo anaxu tanixu ne. Xe loxovaa itema vile xooxoo ungasou uasi ia Lataua mu'avalou? La mamu sou anu umalanixu sou xooxoo ungasou la. 19 ^eXo xooxoo ungasinge ne anu mii vitanisi mo xooxoo ungasinge uasi ne anu mii vitanisi kalumo. Ia mii ane maninasi a lexe tamulinu lapuloto noxou Lataua. 20Itema vilevilesi ne uxolu no nano no anu mauli e anu muxolu no anu io Lataua mu'avalou. 21Loxovaa nini nexolu loxo itema sou uxaxai vitanisi no mine Lataua mu'avaline? La mamu sou mii ane ne u'oxo oponeni tu'umaxu. Ia lexe umomomo sou nini mene naululusine la sou tila anu ululusine no anu sakisaki, la na'oxonu aloxo ne. 22 ^fXo anu ane muxolu loxo itema sou ipalupalusousi, ia Tila mu'avalou ne la anu uxali loxo itema noxou Tila ane mululu no anu sakisaki mo vasimolu papaxe. Xe iouvilesisi aloxo ne la itema ane vasimolu papaxe, ia Tila mu'avalou, la anu uxali loxo itema noxou Kalisito sou upalupalusousi. 23Ngingi ne Lataua muno'u 'ulu tilasinge la sou ngaxali loxo ngamitema sou ta mitema ipalupalusingesi mamu. 24Ta vivilo, nenge vilevilesi ne taxolu noxou Lataua no anu mauli aloxo texolu no anu tei no mine anu mu'avalinge.

25Ano 'o vaikalasi'a ta samula. Eni ano'u vaikala pekia'u molu noxou Tila uasi. Ia eni avelunu vaikala ano 'o aloxo eni Paulo ane no anu alauna noxou Tila la Anu uvikala ne maninasi. 26Xo tava'u loxo tu'utu'umaxu vaimomo 'o la eni exavutala lexe anu laixe noxinge sou ngaxolu aloxo ngexolu ne. 27Loxovaa nini netaula'i? Ia ngakamuli vote'i sou naxexeene semameni mamu. Xe loxovaa nini nataula'i uasi? La nakamuli ne sema sou nauluxe mamu. 28Ia lexe nini netaula'i la nini na'oxonu susu uasi. Xe lexe vuanga vile itaula'i la ane i'oxonu susu uasi. Ia ane'i ane itaula'i la ane'i ixalisou tu'utu'umaxu tapiena no anu maulixa'a. Mo eni emasaxa sou aumengengi no anu mii ane ne. 29Ta vivilo, vaikala noxilo ne laaxu aloxo 'o. Voxo anu a ataxu ne. Mo usoko 'o ulai la ta mulu ane mi'uluxa'a ta semai'a ne ixolu aloxo ane'i ia sema uasi, 30xe ane'i ane itatama ne ixolu loxo ilavusou itatama uasi, xe ane'i ane i'osa'osa ne ixolu loxo ilavusou 'osa'osa uasi. Mo ane'i ane ilavusou ilotonu mimii ne ixolu loxo ta mitema ane'i i'a mimii sou imulaxu uasi. 31 ^gXe ane'i ane ilavusou ixaxai no anu mimii sou lialia 'o ne uxali loxo 'au'au tatila no anu maulixa'a uasi. Xo lialia 'o ne ilou mimii no anu ne anu aso ukalu. 32Eni amasaxa lexe masaxa sou tangengi utulu mimii sou lialia 'o mamu. Itema ane utaula'i uasi ne anu tanu utulu xaixai noxou. Tila anu umasaxa sou u'oxonu mimii ane Tila umasaxau mo u'osasou. 33Ia itema ane mutaula'i ne xavutalau u'au'au no anu mimii ane sou lialia 'osi. Anu umasaxa sou u'oxonu mimii ane semau imasaxau mo i'osasou. 34La masaxa mo xavutala noxou ne mukalipala. Sema ane itaula'i uasi mo vuangasi ne ane ixavutala u'oki no anu xaixai noxou Tila. Masaxa tatila noxie ne lexe iitine ikalusi ilai noxou Tila no anu vasimele mo uleene kalumo, ia sema ane mitaula'i ne ixavuxavutala no anu mimii ane sou lialia 'osi. Ane imasaxa sou i'oxonu mimii ane mulue umasaxau mo u'osasou. 35Eni avivikala no anu vaikala ano 'o ne sou u'oxongengi ngaxolu laixe, ia loxo eni akakapingenge uasi. Eni emasaxainge sou ngaxolu la ngamulinu 'ili'ilixo uisalili mo sou nga'oxonu xaixai noxou Tila laixe io xavutalamengi ukalikalipala mamu.

36Lexe itema vile uxavutala lexe anu mu'oxonu 'ilixo laixe uasi ulai noxie vuanga e misosovosiesi lexe anu u'uluxe ne uasi, mo ane mixolu tauu lele'e piena mukalu io anu uxamulinu masaxa sou taula'i, la anu u'oxonu axo mumasaxaie ne. La anu ususu uasi. Ane'i ilou itaula'i. 37Ia itema ane molu mu'oxonu xavutalau io evile upalusou sou utaula'i uasi, mo umomomo sou usaxila'u masaxa noxou la, xe xavutalau muxali pekia'u lexe anu u'uluxe vuanga ne uasi. La itema ane ne mu'oxonu mii laixe kalumo. 38La sou anu ane mu'uluxe vuanga ne mu'oxonu mii laixe. Ia anu ane u'uluxe uasi ne, mu'oxonu mii laixe musuku.

39 ^hSema ne ixolu no 'a sakisaki sou taula'i noxou mulue no voxo ane anu uxolu umauli. Ia lexe mulue usoli la ane ilulu no anu sakisaki ane ne, mo ane imomomo sou itaula'ixu itema 'ena'ei e ane imasaxau ia laixe lexe itema ne anu noxou Tila. 40Ia noxilo la eni exavutala lexe loxo ane ixolu aloxo nesi la ane i'osa manina. Mo eni exavutala lexe Lataua Uleenu a muxolu noxilo 'o.